არ ვიცი გარეთ რა ამინდია

წელიწადია მინდა გავიგო

დასარწევ სკამზე ვზივარ და ვხედავ

მტვერმა თაროზე ბუდე აიგო

არ ვიცი გარეთ რა ამინდია

იქნებ დარია, ხარობს ვარდები

კედელზე ჩემი ფანჯარა კვლავაც

დაფარულია სქელი ფარდებით

არ ვიცი გარეთ რა ამინდია

იქნებ წვიმაა ან თუნდაც ელავს

ან თუნდაც შლეგი, გულცივი  ქარი

დიდ ცაცხვის ხეებს ულმობლად ცელავს

არ ვიცი გარეთ რა ამინდია

მითხარით ვინმემ... ნუ დამზარდებით

და მეც გავაღებ დარაბებს ფართოდ

განიავდება ძველი დარდები