კატალონიურმა "ბარსელონამ” კიდევ ერთი რეკორდი მიითვალა. ამჯერად ის ევროთასების მატჩებში გოლების სერიას ეხება.
Infostrada-ს ცნობით, ბატე-ს კარში პირველი გოლის გასვლის შემდეგ გაირკვა, რომ "ბარსელონა” ზედიზედ 28-ე შეხვედრას ასრულებდა შედეგიანად და ამ კუთხით რეკორდსმენი გახდებოდა. გარდა ამისა, აქამდე არავის გაუტანია ჯგუფური ტურნირის მატჩებში 20 გოლი – სწორედ ამდენი მოუგროვდა კატალონიურ გრანდს "მილანთან”, "პლზენთან” და ხსნებულ ბატე-სთან პაექრობა.
აღსანიშნავია, რომ "ბარსელონამ” ბატე-ს "ნოუ კამპზე” პრაქტიკულად ახალგაზრდული გუნდით უმასპინძლა და მიუხედავად ამისა, 4:0 იმარჯვა. გუნდის მთავარი მწვრთნელი ხოსეპ გვარდიოლა როგორც შედეგით, ასევე რეზერვისტების თამაშით კმაყოფილი დარჩა.
"მატჩამდე ბიჭებს მოვუწოდე, რომ მოედანზე გასულიყვნენ და თამაშისგან სიამოვნება მიეღოთ. მათ მომისმინეს და დიდებულად ითამაშეს. ძალიან მნიშვნელოვანი იყო, ეს ბიჭები საქმეში ამ დონეზე გვეხილა. მათ თავიანთი შესაძლებლობები დაგვანახეს და ახლა ნებისმიერ შემთხვევაში შეგვიძლია მათი ნდობა”, - განუცხადა გვარდიოლამ Europapress-ს.