10:11 PM ბიძინა ივანიშვილი - "ნაციონალებთან" პინგ-პონგის თამაშს ვწყვეტთ | |
| "ნაციონალური მოძრაობის" წარმომადგენლებთან პინგ-პონგის თამაშს ვწყვეტთ, - ამის შესახებ იუსტიციის სახლში უმრავლესობის წევრებთან გამართული შეხვედრის შემდეგ პრემიერ-მინისტრმა ბიძინა ივანიშვილმა განაცხადა. მისი თქმით, "ნაციონალური მოძრაობა" ყოველდღიურად ახდენს სიცრუის ტირაჟირებას, რაზეც ხელისუფლებას მომავალში რეაგირება აღარ ექნება. "სააკაშვილის ხელმძღვანელობით, ყოველდღიურად სიცრუის ტირაჟირება ხდება. მერაბიშვილი ეკონომიკაში კრიზისზე და ათას რაღაცაზე საუბრობს. ჩვენ გადავწყვიტეთ, რომ მათ განცხადებებზე რეაგირებას აღარ გავაკეთებთ და პინგ-პონგს აღარ ვითამაშებთ", - განაცხადა ბიძინა ივანიშვილმა, რომელიც ვანო მერაბიშვილის გუშინდელ განცხადებას გამოეხმაურა. ამასთან, როგორც ბიძინა ივანიშვილმა დღევანდელი შეხვედრის შესახებ კომენტირებისას განაცხადა, აღნიშნული შეხვედრის დეტალებზე უმრავლესობის ფრაქციის ოთხი ხელმძღვანელი ორშაბათს, 12.00 საათზე ბრიფინგს გამართავს და დეტალურად ისაუბრებს. "ნაციონალური მოძრაობის" გენერალურმა მდივანმა ვანო მერაბიშვილმა გუშინ განაცხადა, რომ "ნაციონალურ მოძრაობას" მოქმედი ხელისუფლების დასუსტების გეგმა უკვე აქვს. "სამწუხაროდ, ეს მთავრობა ისეთია, რომ ჩვენ ვერ დაველოდებით 4 წელიწადს. ეს რომ ყოფილიყო შედარებით ნორმალური ხელისუფლება, თუნდაც გაჩეჩილაძეზე იყოს საუბარი, მე გაჩეჩილაძეზე კარგი აზრის არა ვარ, მაგრამ შეიძლებოდა თქმა, 4 წელი დაველოდოთ. მაგრამ ამ მთავრობას ჩვენ 4 წელიწადს ვერ ვაცდით. ეს არ ნიშნავს, რომ მივვარდებით ხვალ და სახელმწიფო გადატრიალებას მოვაწყობთ და ჩამოვაგდებთ, მაგრამ ჩვენ მათ არ უნდა მივცეთ საშუალება, ის გეგმები, რაც აქვთ, როგორც გამოჩნდა, როგორც მინიმუმ საქართველოს დასუსტება, არ უნდა დავუშვათ. ხელისუფლებაში მოსვლა არ ნიშნავს მაინც და მაინც, რომ საპარლამენტო არჩევნები უნდა ჩავატაროთ. ამის სხვადასხვა მეთოდი არსებობს - რეალური საზოგადოებრივი კონტროლის განხორციელება, სახელმწიფო ინსტიტუტების დასუსტება, ადამიანების გადაბირება. 2003 წელს რევოლუციამდე რაღაც ფორმით ჩვენ ვიყავით ხელისუფლებაში, ვაკონტროლებდით მერიას. ასე რომ, რაღაც ფორმით ხელისუფლებაში დაბრუნება და ინიციატივის ხელში აღება უნდა დავიწყოთ. მაგალითად, ახლა მიტინგებს აწყობს მთავრობა, ხელისუფლება, რომელიც მიტინგებს ატარებს, ისედაც სუსტია, მაგრამ ჯერჯერობით ჩვენ შეტევაზე ვერ გადავედით. ჩვენ ნაბიჯ-ნაბიჯ უნდა შევავიწროვოთ ეს ხელისუფლება და დავაჩქაროთ ამ ხელისუფლების ცვლილება. როგორი ფორმით, ამას აჩვენებს დრო და ის საშუალება, რომელიც გვექნება. დღეს ვართ დაკავებული რესურსების შენარჩუნებით, ადამიანების გამხნევებით. ზამთარია და ქუჩის აქციები ჯერ ადრეა. ჩვენ გვაქვს მთელი არსენალი, როგორც ვირტუალური, ასევე პრაქტიკული, რომელიც დაასუსტებს ამ ხელისუფლებას", - განაცხადა მერაბიშვილმა. | |
|
| |
| სულ კომენტარები: 0 | |