9:50 PM საქართველოს ნაკრებმა ერთა თასი ბელგიის ძლევით დაიწყო | |
| 2 თებერვალს საქართველოს მორაგბეთა ნაკრებმა ევროპის ერთა თასის 2013 წლის გათამაშების პირველი მატჩი სტუმრად ბელგიის ეროვნულ გუნდთან გამართა. ბრიუსელში გამართულ შეხვედრაში ანგარიშის გახსნა სტუმრებმა შეძლეს და 7:0 დაწინაურდნენ, რასაც მერაბ კვირიკაშვილმა მალევე ზუსტი საჯარიმოთი უპასუხა - 7:3. პირველი ტაიმი ამ ანგარიშით დასრულდა. მეორე ტაიმის განახლებისთანავე მასპინძლებმა ანგარიშში ათი ქულით დაწინაურება შეძლეს - 13:3. ამან გამოაფხიზლა მილტონ ჰეიგის შეგირდები, რომლებმაც დიდი ძალებით შეუტიეს მეტოქეს და ზედიზედ რამდენიმე ეპიზოდში მამუკა გორგოძის ბრწყინვალე თამაშის ხარჯზე სხვაობის შემცირება შეძლეს. გორგოძის ლელოს "მეკომ" ზუსტი გარდასახვა მიუმატა - 13:10. საქართველოს ნაკრებმა ანგარიშში წინ გასვლა ლევან ჩილაჩავას ლელოს შემდეგ შეძლო. კვირიკაშვილმა არცთუ სახარბიელო პოზიციისა და ძლიერი ქარის მიუხედავად გარდასახვა ზუსტად შეასრულა - 13:17. ამის შემდეგ ბელგიელმა მორაგბეებმა სცადეს ვითარების შეცვლა, მაგრამ მათ მცდელობას შედეგი არ მოჰყოლია. შედეგად საქართველოს მორაგბეთა ნაკრებმა წელიწადი გამარჯვებით დაიწყო. ერთა თასზე მომდევნო მატჩს "ბორჯღალოსნები" 9 თებერვალს თბილისში, მიხეილ მესხის სახელობის სტადიონზე, პორტუგალიელებთან გამართავენ. | |
|
| |
| სულ კომენტარები: 0 | |